سلمى وياسر (قصة 2)

[زهراء الربيع]

سلمى وياسر

مهندسان زراعيان حديثا التخرج
لم ينتظرا ضربة حظ أو ثروة تهبط عليهما من السماء ليحققا حلم الزواج

تقدما بطلب للحصول على أرض في النوبارية وحصلا عيها بعد صبر ومثابرة
الأرض في الكيلو 70 جنوب الإسكندرية وإلى الشرق 36 كيلو في عمق الصحراء بنيا فيها بيتا عبارة عن غرفة واحدة بمنافعها
وبمساعدة الأهل اشتريا سيارة نصف نقل قديمة تساعدهما في أعمال الزراعة
الكل ينظر لحياتهما على أنها منفى ولكنهما وبفضل الله يحققان النجاح فيها
فقط يفتقدان الولد بعد زواج لمدة عامين
يقوم ياسر وسلمى برحلة أسبوعية 106 كيلو إلى أطراف المدينة للتزود بالمؤن الأساسية للمنزل
هذا الأسبوع سيذهب ياسر وحده لماذا ؟
سلمى تبدو عليها أعراض الحمل لم يتأكد الأمر بعد وقد نصحت بتجنب المشوار
الذي تتحمل فيه كثيرا من الهبد والرزع
بما يكفي لحدوث الإجهاض المتكرر .
حضرت سلمى لياسر لستة بالطلبات اللازمة راجعاها سويا
من حسن الحظ أن شبكة المحمول تعمل في بيتهما الصغير ولكنها لا تعمل في ال36 كيلو حتى الطريق الصحراوي
ياسر مشغول على سلمى لأنه سيتركها وحدها ولكن ربنا يستر لن يتأخر؟

ياسر الآن شخص آخر تائه نزيل العباسية عنبر 5 (عنبر الخطرين )
يا تري إيه السبب ؟؟؟؟؟؟؟؟؟؟؟؟
------------------------------------------------------------------
إليكم ما حدث :
ودع ياسر سلمى وأوصاها على نفسها واستودعها الله وتوكل عليه

ما إن اقترب من الصحراوي واشتغلت شبكة المحمول إلا ورن هاتفه

أيوة يا روحي خير

ما فيش يا حياتي بس أنت نسيت تاخد الغسالة تتصلح

يااااااااااه نسيتها خالص

حاولت أفكرك بس كنت دخلت في الشبكة الواقعة

أنا راجع

وعاد ياسر تلك الكيلوات ال36 وأخد الغسالة

مش ناسية حاجة تاني ياسلمى

لا يا حياتي نسيت بس أبوسك

والله حاجة تستاهل الرجوع
خللي بالك من نفسك

ياسر إشترى الطلبات من المدينة وبعد أن انتهي من شراء الطلبات اتصل بسلمى

عاملة إيه ي اروحي

الحمد لله تمام

مش عاوزة حاجة ثانية قبل ما أرجع

كنت عاوزة كيوي واحدة بس

بس كده عشرة ولا يهمك

رجع ياسر اشتري الكيوي وقلبه يقفز من الفرحة سلمى بدأت تتوحم

وبدأ في رحلة العودة

الكيلو 20
تررررررررن
أيوة يا روحي

أنت وصلت لفين ياحياتي ؟

أنا في الكيلو 20

طيب ممكن يا عيوني ترجع تجيب لي تحليل حمل

من عينيا عاد وهو يطير من الفرحة

دخل الصيدلية سبع البرمبة وهو يطلب تحليل الحمل

وعاد إلى الطريق الصحراوي

الكيلو 30
ترررررررن
ايوة يا روحي خير

لا مافيش أنا بس نسيت اكتبلك شاي وسكر ياترى افتكرتهم

لا طبعا أنا باشتري المكتوب بس

خلاص أنا راجع تاني افتكري حاجة تانية (قالها بنفاد صبر)

لا يا روحي أنا آسفة مشورتك النهاردة

بسيطة

عاد ياسر واشتري الشاي والسكر

ورجع أدراجه إلى الطريق الصحراوي
الكيلو 50
تررررررن
تردد وهو يرد على الهاتف وقال في نفسه لن أعود مهما كان

حياتي الملح ما فيش في البيت ذرة ملح

مش هارجع


اوكي ياعمري أنا معاك مات رجعش بس فكر في أسبوع من غير ملح
وصل ياسر للكيلو 55 وهو عازم ألا يعود
فكر ياسر جيدا في طعم الكوسة بدون ملح وهي المحصول الذي طرح معهم هذه الأيام كاد أن يتقيأ
عاد ياسر لشراء الملح لم يتصل مرة أخرى وعزم ألا يرد على الهاتف

وصل ياسر إلى البيت وهو مرهق جدا يحلم بكوباية شاي ساخنة ودش راااااااائع

استقبلته سلمى بالقبلات معتذرة عن المشورة ولكن كل هذا لم يفلح في فك البوز اللي ياسر ضاربه
دخل ياسر ليأخذ الدش بينما تحضر سلمى الشاي
سلمىييييييييييي

السخان ماله مابيشتغلش ليييييييييييييه

الأنبوبة خلصت يا روحي

مانطقتيش ليه وأنا نازل

انا مكسووفة منك يا حياتي سامحني نسيت

إعملي الشاي بسرعة علشان انقل أنبوبة البوتاجاز في السخان

بخجل ردت سلمى حبيبي فيه خبر وحش

خييييييييييييير

أنبوبة البوتاجاز كمان خلصت من شوية

خيم الصمت على المنزل تماما
إختفت سلمى من أمام ياسر توقعا لرد فعله
بطريقة آلية لفع ياسر الأنبوبتين على أكتافه ورزعهم في العربية
وعاد ليبدل الأنبوبتين من المدينة
لن أصف لكم حاله عليكم أن تتخيلوا

عاد ياسر إلى البيت لم تحاول سلمى أن تريه نفسها فقط تركت له رسالة أنا حاسة بيك يا يا حياتي
تركت له فرصة ليهدأ غضبه ودخلت من البلكونة محاولة الابتسام
دخل ياسر المطبخ هيعمل لنفسه شاي بنفسه بحث عن الكبريت إضطر أن يناديها

سلمىييييييييي حاطة الكبريت فين
أخخخخخخخخخخخخ الكبريت ما فيش كبريت خلص
خرج ياسر ولم يعد من ساعتها

حالة ياسر ميئوس منها تتلخص فيما يلي بدأت بأنه يدخل سوبر ماركت كبير ويشتري من كل صنف عبوة حتى البامبرز
مع انه ليس لديه أطفال وبعد أن يضع الأغراض في العربة
يصرخ سلمىييييييييي ناسية إإإإإإإيه ثم يشتري كل الكبريت اللي في المحل ويولع في البضاعة وكل من يقترب منه
الدروس المستفادة
. أول درس وهو مهم جدا
ما نتعلمه من بطلينا اللذان لم ينتظرا شقة بمنطقة راقية ووظيفة بمرتب مغري حتى يتزوجا
تصرفا بطريقة عملية جدا وبثمن الشقة أو العفش تحولا إلى أعضاء منتجين في المجتمع
وإستثمرا شبابهما بطريقة صحيحة
2. ثانيا نجد هنا التعاون والمشاركة في كل شيء فهي تشاركه الكفاح في كل شيء
ولولا خوفهما على الحمل لما تخلفت عن الرحلة الأسبوعية والتي ليست دائما ترفيهية
3. لو لاحظتم المقطع كتبت الطلبات وراجعاها سويا لعلمتم أنه الخطأ البشري موجود
ولكن لا يمكن أن نرمي اللوم على الزوجة فقط فالاثنان يعيشان في البيت واحتياجاتهما واحدة
ولكن تأتي بعض الأولويات عند كل واحد هتلاقي مثلا ياسر يكتب
أمواس حلاقة –مفتاح 10 –لوسيون مش عارف إيه لمنع الصلع-بذور أي حاجة غير الكوسة
-سماد من أي نوع غير الحيواني-وهكذا بينما سلمى تكتب
قلم روج لون 36 –زراير قمصان-سكينة مطبخ حامية جدا أو ساطور وأكياس بلاستيك مقاس كبير شديد التحمل
4. الحب والمودة بين الزوجين هو خايف عليها وهي لطيفة جداً في وداعه
بالتأكيد هذا يستمر في عدم وجود أطفال بس يا ريت يستمر بعد وجودهم
5. الاعتذار عند ارتكاب الخطأ وليس محاولة تبريره مهم جداً
فهي تعمل كل عملة اسخم من التانية وتعتذر برقة شديدة تنسي الواحد آلام الدنيا ودي مهارة ليست سهلة
6. الصبر والصبر والصبر شفتوا ياسر صبور إزاي ومهذب إزاي
لفع الأنابيب على كتفه ياضنايا من غير ولا كلمة واحد غيره كان خبطها بيها على نافوخها جابها الأرض
7. أنا حاسسة بيك ياحياتي ياسلام كلمة جميلة جداً لو كل واحد أحس بالتاني هتختفي مشاكل كتير من حياتنا
----------------------------------------------------------------------
الواجب العملي للزوجة
1. علقي في المطبخ وقرب باب البيت سبورة صغيرة أو بلوك نوت وقلم كلما قاربت حاجة على الانتهاء أكتبيها بسرعة
مهما كانت الظروف (بقإلي 20 سنة نفسي أعمل كده )

2. راجعي ورقة الطلبات مرة واثنين وعشرة وتممي على الحاجة بنفسك خاصة لو أنت في حتة مقطوعة زي سلمى
وحاولي دائما إشراك زوجك في كتابة الطلبات حتى يتفرق دمه بين القبائل .

3. إذا حدث المكروه ونسيت شيئاً فسارعي بإخبار زوجك
لأنك لما ترجعيه من الكيلو 20 أرحم ما ترجعيه من الكيلو 50 ده دم ولحم برضو مش روبوت .
4. خللي طريقتك لطيفة في توصيل الأخبار السيئة واتركي له حرية الاختيار
زي مثلا لما طلبت منه الملح ما قالتش لازم ترجع سابته يتخذ بنفسه هذا القرار
وبكده تكونين بريئة براءة الذئب من دم يوسف.

5. المواد الأساسية اكتبيها سواء خلصت أو لا احتياطي زي الملح والسكر والشاي والعيش ومياه الشرب
(في الدول اللي مابتشربش من الحنفية)عمار يامصر والبصل والثوم والكيوي كيف نعيش بدون كيوي .

6. إذا عندك خبر حلو وخبر سيء قدمي الحلو الأول وخلي السيء بعدين
مثلا هي لو كانت أخبرته إن تحليل الحمل إيجابي قبل ما تقول له إن الكبريت خلص
كان الموضوع انتهى نهاية سعيدة بس هي إتصرفت غلط ماتعمليش زيها
(طبعا ده في حالة الحمل الأول بس وبعد تأخير غير كده هتاخدي على دماغك )

7. كلمة آسفة مش عيب ولا هتنقص من قيمتك قوليها دائما سواء غلطانة أو مش غلطانة فهي تفعل مفعول السحر

8. يفضل أن يكون بيتكما به مكان تختفي فيه في مثل هذه المواقف
فهو لو غرفة واحدة يفتح يلاقيك أمامه ويفش غله فيك هتبقى ليلة مش فايتة
ولكن إختفي في البلكونة أو الحمام حتى يهدأ قليلا
9. دائما إشعري بزوجك وضعي نفسك مكانه في كل شيء
روي أن زوجة إستحقت الجنة لأنها كانت تبرد الماء لزوجها وتتهيأله وتهيء له البيت
مستشعرة القيظ الذي يعانيه والشقاء الذي يشقاه من أجلها فاتخذيها قدوة
(ياسلام لو ييجي يلاقيك حاطة الميه في الفريزر وكلها متجمدة وما فيش نقطة سائلة يشربها
والمكيف عإلي على الآخر وييجي من الحر ياخد نزلة شعبية مين فيكم اللي له الجنة )

10. وأخيرا ابنتي الزوجة الصالحة الإحساس بالمسؤولية المشترك بين الزوجين
هو أعلى مراتب الحب في الحياة الزوجية أدام الله المودة بينكما . ووقاكما شر محاكم الأحوال الشخصية

ماما
------------------------------------------------------------------------
الواجب العملي للزوج

1. لا تنتظر من زوجتك أن يكون عقلها دفتر وتوقع الخطأ وشاركها في كتابة الطلبات وتمم على كل حاجة بنفسك
واغفر الخطأ والنسيان فالله قد غفرهما فما بالك أنت .

2. الأفضل طبعاً أن تسكن في وسط المدينة في مكان تتوفر فيه جميع الطلبات
وياريت لو عندكم بواب إبن حلال المدام تبهدل في كرامة أهله وتمشوره وتخلع أنت من الرواية كلها

3. أو تسكن في منطقة راقية ما فيهاش بقالات ولكن يمكن فيها توصيل الطلبات للمنازل
وإدفع وأنت ضميرك مستريح

4. إستجب لنداءات المرأة بالمساواة بالرجل وتقليد المجتمع الغربي وإرم لها مفاتيح العربية
واللي عاوز حاجة يروح يجيبها

5- طبعا المشكلة دي يواجهها بكثرة قاطنوالدول التي يكتب على أبواب السوبر ماركت فيها ممنوع دخول النساء
ولا يسمح بخروج النساء وحدهم ولو وافد جديد غلط ودخل بزوجته السوبر
لأقبلوا إليه يزفون كله عاوز يتأكد دي حرمة بحقيقي واللا بلاستيك
ولذلك أنصحك في مثل هذه الحالة إنك تختار أشد الأيام قيظاً وتنزل بالمدام تتركها بالسيارة
وتاخد لستة الطلبات تدخل تجيبها طبعا أنت جوه في التكييف وهي بره هتسيح من الحر
هتلاقي ربنا فتح عليها فجأة بكل ما هي ناسياه لأنها لا تريد أن يتكرر هذا الموقف
وبكده هيتحقق حاجتين هتختصر الطلبات للضروري فقط ومش هتنسي حاجة تاني
بس خللي بالك لو زودتها ممكن تنزل أول أجازة لبلدها وما ترجعش

6- الصبر ثم الصبر ثم الصبر وهو من أهم أركان حسن العشرة.

7- مش مطلوب منك إنك تتحمل فوق طاقتك لغاية ماتتجنن فضفض
إبني لنفسك غرفة منفصله تزعق فيها وتخبط راسك في الحيط
أو خلفلك عيلين تلطشهم في مثل هذه الأحوال ولكن إياك والكلام مع زوجتك وأنت غضبان

8- بالطبع لو كنت تعرضت مرة للإعتقال فهذا أفضل لأنك ستتحمل طعم الكوسة بدون ملح
وإن لم تكن من هواة المعتقلات فحاول تعود نفسك على تحمل جميع الأحوال
الدوش المثلج في عز البرد وتوليع النار بحك خشبتين في بعض
(راجع مجلد ميكي رقم 13 لمعرفة الطريقة ) وهكذا لن تضطر لان تتمشور كل هذه المشاوير .

وأخيرا خد النصيحة ممن سبقوك وتحمل فالجواز للجدعان

منقووووووول

[FONT=/'Tahoma/']
[/font]

[tottyfrotty]

موضوع تحفه والقصه هايله بشكرك على النصائح القيمه واللى عرضيها بالطريقه الجميله المكتوبه

[زهراء الربيع]

شكرااا لردك الجميل توتى
واحب اقولك ان الموضوع منقووول**
شكرااا لمرورك جدااااااا**